菲妮公主事件簿

原以為自己不會太不捨得, 話晒都只係返屋企, 加上返到香港更有十萬個好處。媽咪咪就唔係話好鍾意美國, 但估唔到真係要走, 又好唔捨得。

最討厭電梯在一樓, 帶嬰兒車時要行車房, 仲要經過垃圾桶, 就係唔捨得; 每次出街或回家, 最少要開三度門, 很多時侯係要開五度囉, 就係唔捨得; 買餸一定要坐車先去到, 好多時仲要等埋爸bu, 放工先去(因為冇咁好力), 但就係唔捨得。

初初搬嚟, 幾經辛苦才找到買床褥及書桌。床架可是到懷孕後才添置。

最初, 我們常帶著一個細行李箱去中國城去買餸, 一次可以買多些, 因為覺得坐捷運好貴。

那個淩晨感到下體的暖流, 知道小生命要來臨, 兩人手忙腳亂地張羅著, 心急地等著遲遲未到嘅的士, 最後還是在醫院等了十數小時。

那些晚上拖著疲累的身軀, 抱著小公主在懷內, 讓她在胸前大快朵颐。

有一次, 婆婆幫媽咪咪坐完月後回港不久, 她小公主明明肚餓非常但又不肯食奶, 令到我這個第一次媽媽不知所措, 只有抱住小人仔一齊喊。

這裡也是小公主, 第一次見到婆婆, 第一次笑, 第一次自己反身, 第一次跌落床, 第一次自己揸奶瓶, 第一次叫爸爸﹑媽媽, 第一次食奶以外嘅食物, 第一次自己企, 第一次自己行, 第一次駁嘴, 有自己嘅朋友, 等等……..

唉, 唔捨得呀! 也擔心小公主適應問題, 怕她念掛這裡但又唔識表達。