菲妮公主事件簿

終於完成妳件披(肩)

之前提過件披肩織到尾段唔夠冷, 好在友人幫助找到, 終於新一年來臨前織起。雖然完成後跟圖有少少分別, 不過媽咪咪都好滿意件作品, 尤其係覺得個款幾型!哈!

材料: STITCH NATION by Debbie Stoller™ “Full o’ Sheep™” (100% Peruvian wool);

顏色: Aquamarine 2510 ;

織針: Susan Bates Silvalume Circular Knitting Needle 32” 4.5mm (US 7) + Addi Turbo32”circular 10mm (US 15) ;

織法: 個款係我睇日本編織書睇到嘅。首先用4.5mm環針起96針, 低針織12個圈。換10mm針, 織一圈高針一圈低針, 每24針加一個Stitch markers, 織兩圈。之後繼續織一圈高針一圈低針, 每兩圈(織低針個圈)在每個stitich markers前後加一針至總數208針。繼續織一圈高針一圈低針, 共8個圈, 再在每個stitich markers前後加一針至總數216針。將216針分4份, 每份54針; 第一份, 收針。第二份織兩行低針後, 每兩行在開始及尾段分別減3針, 至剩餘12針, 再織一行低針。然後兩針織一針成6針, 織一行低針。再兩針織一針至餘3針, 收針。第三份, 收54針。第四份重複第二份織法, 即成。

表妹聖誕小紅裙

過去兩星期忙得利害, 連博客也停頓了, 上一個出版是半個月前預設的。忙什麼呢? 就係聖誕喇!

首先一如去年, 小公主要畫聖誕咭寄到香港及她的朋友, 今年她自己決定要送給誰, 數一數要畫廿多張。郵寄需時, 所以一進入十二月她每天都要畫, 在上學的日子, 她回家後吃過晚飯和沖涼後, 就要畫咭, 終於上星期完成大部份, 特別是要郵寄那些。媽咪咪已把所有聖誕咭寄出, 希望聖誕節前你們會收到。收唔到嘅親友不要傷心, 因為製作需時, 但又時間有限, 不能送給所有人啊!

小公主要做咭, 唔代表媽咪咪得閒, 小公主畢竟只有四歲, 媽咪咪都要幫助比一些意見﹑教她寫字之類。到小公主就寢,  媽咪咪就忙住密密織。

第一件就係表妹嘅小紅裙, 難度在於要計尺寸, 因為個織圖係比兩歲小朋友, 所以媽咪咪按比例計番6-12 個月應該係幾闊, 再計針數; 改咗尺寸又要改吓個花紋。織好快, 但改lee改lo花咗好幾晚。

完成表妹的, 又到想起小公主上學時手手常常涷冰冰, 於是織好一早應誠佢嘅手套。

好喇, 最後就係好友嘅披肩, 這件披肩, 開始咗好耐, 暑假响香港已經織緊, 應該係生日禮物, 點知媽咪咪又有咗, 日日都想訓, 另一個原因係原本織圖係一行粗針織, 一行幼針織, 但媽咪咪選嘅毛冷跟織圖嘅標準尺寸有出入, 所以一面織就一面拆, 所以遲遲都未織好。好喇, 諗住聖誕送啦, 仲諗住唔好煩, 改埋用一套針織(唔再一行粗針, 一行幼針), 點知織到仲有大約一日時間就完成, 諗住得啦, 趕到寄喇, 又唔夠毛冷, 去買又無貨, 係咪嬲!  好在有個朋友幫忙, 在她家附近幫媽咪咪找到, 雖然趕不及聖誕, 但可望完成也不致浪費心機!

講咗咁耐, 睇吓表妹條小紅裙先:

(前)

 (後)

材料: Wool 100 (100 % wool) 4 個<從香港買> ;

顏色: 鮮紅10;

織針: Areo 4 mm (US 6) 鐶針。(毛冷建議用4 – 4.5mm 針)。

媽咪咪自己很喜歡這小紅裙, 希望表妹合身, 因為在鏡頭中看, 小表妹都好健碩吓, 哈哈!